Biblioteca "Poeta Díaz Castro"

Pois si, foi o peche estelar do curso, poeticamente falando, ser teloneir@s do Iº Festival de Poesía Guitirica ... o alumnado de 3º e 4º ESO achegouse na mañá do venres 11 de xuño ata a Casa Habanera para visitar a exposición de Xela Arias, e tamén para recitar os seus versos e mesmo interpretar algún musicado. O escenario non podía ser máis acaído! 3º ESO A coa profe de música, interpretando un poema de Xela Arias 4º ESO, entre poemas de Denuncia do equilibrio e as súas mensaxes secretas.... Así cantamos coma trobadores polas prazas e rúas de Guitiriz, non houbo mascarillas que calasen as nosa voces e recitados.                    Interpretando poemas de Xela Arias  e Manuel María E para o ano, contamos estar xa na sección oficial do festival, somos poetas!

  Obradoiro  de Regueifa con Lupe Blanco Antes de comezarmos as vacacións de verán, puxemos en práctica a nosa habilidade e enxeño. Tivemos connosco á regueifeira bergantiñá Lupe Blanco impartindo un obradoiro en 1º ESO . Lupe ensinounos a arte da improvisación oral en verso, falounos sobre a súa evolución e descubrimos outras manifestacións similares que non só na Galiza, senón que tamén fóra.  Aquí a mostra dos grandes regueifeiros do centro Ademais, coñecimos a dous improvisadores veciños de Guitiriz: Reinote, coñecido como "O Capador",e a Josefa da Requecha.

... ata o vindeiro curso. Fomos adiando a xuntanza por exames (😱) e saídas (😃) pero ao final cadramos a primeiros de xuño para falar do que cadaquén leu pola súa conta este trimestre, do que imos facer / ler no verán... e para poñer en común Be Water , que aínda estaba agardando no caixón a súa oportunidade... Isto @s máis nov@s, porque o alumnado da sección de poesía na súa maioría xa andaba noutra lea: preparar as ABAU. Antes de marcharen, fixemos unha última actividade moi creativa! Maio 2021, creación colectiva inspirada nos tres primeiros versos dun poema de Tigres coma cabalos Que? Gustouvos? Pois xa sabedes... vémonos á volta das vacacións, na biblio, coma sempre.

  Escritura Creativa  con Andrea Brións O pasado mes de maio, a activista e escritora Andrea Brións impartiu un obradoiro de escritura creativa para a rapazada de 1º ESO. Nel, o alumnado traballou a creatividade, a autoestima e a creación a través de exercicios prácticos e da elaboración de composicións propias,  vivenciando a palabra como forma de expresión de sentimentos e emocións.  Para isto, tívose en conta o proxecto "Cruceiro" no que está envolto o curso  para traballar ao redor de temáticas de viaxes, diversidade cultural, historia... Grazas a Iria pola información compartida!!